Somos Inclusión é un inventario web de propostas artísticas activas que desenvolven entidades e asociacións galegas para traballar a inclusión de persoas con diversidade funcional e/ou outras capacidades. Nese gran marco englóbase o teatro, a música, a danza, as artes plásticas ou visuais e moitas outras.

Defendemos as diversidades e a igualdade de oportunidades, para o que consideramos imprescindible reivindicar o dereito ao ocio e á cultura de todos os sectores da sociedade. E nesa universalidade necesaria entra tamén, obviamente, o rural. A oferta cultural fóra das cidades favorece o desenvolvemento local e a vida plena de moitas persoas. Porque si, a cultura é vida.

Este catálogo dixital de acceso libre nace da man de Artefeito S. Coop. Galega, coa colaboración da Deputación da Coruña, coa finalidade última de contribuir a unha inclusión plena e real. Para conseguilo, irá mudando segundo vaian cambiando as circunstancias das entidades e dos seus usuarios e usuarias, que ao final son as únicas protagonistas.

Explorádeo. Entrade e saíde. Adaptádeo ás vosas necesidades. Sexades responsables de programacións culturais, traballadores ou traballadoras dunha entidade integradora e/ou público xeral de arte e cultura, agardamos que este catálogo vos inspire e nos axude a abrir novos ámbitos de relación coa creación artística, novos espazos de crecemento colectivo e novas programacións culturais máis amplas, igualitarias, diversas e inclusivas.

Se precisades máis información, non dubidedes en contactar con nós.

somosinclusion.gal
somos.arte.inclusion@gmail.com
981 58 28 36
Triascastela, 3. CP. 15703
Santiago de Compostela
(A Coruña)